26/04/2022: DIYOSEZI GATOLIKA YA GIKONGORO IKOMEJE GUFASHA ABATURANGE KWITEZA IMBERE IBINYUJIJE MURI CARITAS YAYO KU NKUNGA YA TROCAIRE

Ku wa Kabiri, tariki ya 26/04/2022, mu cyumba cy’inama cya Paruwasi Ruramba, habereye inama yo gutegura isozwa ry’Umushinga wo Kwihaza mu biribwa binyujijwe mu buhinzi burambye buhangana n’ingaruka z’imihindagurikire y’ikirere. Ni umushinga Caritas ya Diyosezi Gatolika ya Gikongoro iterwamo inkuga na Trocaire (Caritas yo mu gihugu cya Irlande). Ukaba waratangiye mu mwaka wa 2017.

Iyi nama yahuje inzego za leta, inzego za Kiliziya z’aho umushinga ukorera, abakoranabushake b’umushinga ndetse n’abahagarariye abagenerwabikorwa b’umushinga.

Harebewe hamwe ibyagezweho n’umushinga mu gihe cy’imyaka 6, ingorane ndetse n’ingamba zafatwa kugira ngo ibyagezweho bikomeze kwitabwaha no kubungwabungwa neza. Bimwe mu bikorwa byagezweho, harimo: gufasha abagenerwabikorwa kubona ibigega bifata amazi y’imvura, kubafasha kubona imyayi y’imboga n’imigozi y’ibijumba, kuboroza amatungo magufi, kubafasha guhanga imirimo ibyara inyungu binyujijwe mu matsinda yo kwizigama no kugurizanya, guteza imbere ibikorwa by’abaturage byo guhangana n’ingaruka z’imihindagurikire y’ikirere harimo gutera ibiti bivangwa n’imyaka, no gukoresha amashyiga arondereza ibicanwa (Canarumwe).

Alfred, Umukozi wa Caritas Gikongoro, agaragaza ibyagezweho mu myaka 6
Abitabiriye iyi nama bahawe umwanya wo kujya mu matsinda no gusangiza abandi ibyo bayakuyemo

Categories: